年輕人最大既朋友 - 時間 (複利效應)

係上一篇文同大家輕輕講左 現金流資本累積系統
呢個系統係建基於複利息效應身上
就係將利息放返入去個系統入面, 利疊利, 積少成多

假設有2個情況, 每月大家都存2000蚊, 存10年

咩結果一目了然, 如果剩係放銀行, 10年你會有24萬,

如果你係投資係有5厘回報既產品上面, 10年你會有31萬

而呢個只係你每個月存2000蚊既效果, 

你諗下如果你每個月存到6000蚊? 咁就已經好快有100萬,

我地之前講過100萬有5厘可以有咩效果?

被動收入系統: 一年多5萬蚊洗! 

如果你將呢5萬繼續掉入去滾存, 

其實佢自己已經可以足夠派雪球喇

咩意思? 你有5萬, 每個月有差唔多4千5千, 

變相係你之前每個月存既錢黎, 

即係宜家你每個月唔洗存自己收入都得

不過我相信到時大家都會存錢存上癮,

愈存愈多唔肯拎返出黎

咁20年有咩效果呢?

你就明我點解講會上癮

想試下個計算機可以點擊呢度

所以時間係年輕人既朋友,

做投資愈早開始愈好, 複利既效應先會出到黎

係度我會同大家講一句加油先

存錢比率愈高, 對自己愈苦, 將來就會愈甜

可能大家唔知買乜可以有5厘,

我求其講下先, 我呢個BLOG會集中講存錢多D

如果你地想睇多D投資的話可以去下鍾記

我自己係一個非常保守既投資者

第一件事係千奇唔好蝕錢

第二件事先係賺錢

咁目前有5厘而我又會願意分享比大家買既就係

5號 匯控, 同1928 金沙

我有持有上述股票, 但係請大家務必仔細分析後先買入

年輕人最大既敵人 - 速食文化?

我諗大家都好清楚宜家呢個年代
快, 速食已經係一種價值觀
好多時好多野都要好快得到
唔係既話就好容易放棄, 冇左個陣堅持既毅力係度

其實係大家讀書既時候
社會已經慢慢教緊大家時間既重要性
小學功課要第2日即刻交
中學功課可以隔幾日交
大學畢業個份功課甚至叫你做一年
出到黎做野就會發現好多project都係用幾年幾年去計
當中既目的係d咩其實大家有冇諗過?
就係教大家羅馬不是一天建成的
好多野都要逐小逐小去砌好, 最後完成一個大系統

而被動收入系統又好, 買樓首期又好
都唔係一筆細數目, 就好似上面講既大系統咁
你岩岩出黎唔會話一定有可能突然拎到咁大筆錢出黎
結果到宜家好多80後90後就會話
樓價太高呀, 救命呀, 冇父幹冇得玩
的確門檻係高左, 但係現實係適者生存既遊戲
你要識得係呢個玩法生存, 而唔係怨個玩法唔公平
唔公平你怨都冇用, 
唯一有用既係利用呢個玩法入面既系統,
去做好自己, 去令自己更有競爭力

而我會叫呢個系統做 現金流資本累積系統
聽落好勁咁, 其實只係不停用 複利息 既概念
咁至於呢個系統既詳情係點呢? 下一篇文同大家講一講

年輕人最大既敵人 - 消費欲?

宜家呢個社會
今日出新電腦, 聽日出iphone X,
每個月月初話要存錢, 去到月底,
發現戶口入面又已經所剩無幾,
然後就再等下個月出糧, 有D更加慘既係出糧係為左找上個月卡數
有冇聽過呢D咁既故事?

係年輕一輩之間
每個人手上總有1, 2件名牌,
久而久之就變左唔係名牌既唔買,
唔係名牌既唔著, 甚至追店最新出既品牌野, 你懂的
生活品質一開始就咁高當然唔會有任何儲蓄,
人工一加, 又再買好D多D, 買埋車, 睇落好中產
其實外強中乾, 冇料扮四條

我想同你地講既係
你地如果肯立定決心去做儲錢的話一定可以做到
點解要儲蓄?
為未來唔洗再咁努力而宜家加倍努力
因為買唔起樓就想將買樓個幾百萬洗左先?
咁樣你地就會一直為左還債找卡數一直工作
做到死個日都未還得清

輕輕講下少少, 遲下會再講多好多:
最容易同簡單既方法係一出糧,
儲低你人工一定百分比 (儲蓄比率%),
難既一開始可以儲多D, 50%已經好勁,
覺得想一步一步既,
當幫自己供多份MPF,
5%又好, 10%又好,
儲落一個戶口到, 你係永遠都唔會洗佢既
肯行第一步,
我相信之後你地既生活一定會更好
向1308000又行近一大步

如果肯每日黎睇的話
相信你都係有決心想改變現狀既人,
我會寫多D儲蓄既辦法, 一齊努力加油!

財務自由既概念同埋方向 (二)

咁上一篇文就有輕輕帶過被動收入呢樣野
但係到底要幾多被動收入先夠呢? 又或者到底要點做呢?
唔好急住, 宜家就同你慢慢解釋件事係點運作架喇

1. 幾多被動收入先夠?

          假設你一個月剩係需要負擔食同交通既, 

          假設一日食飯用150蚊, 一個月交通800蚊, 

          咁一個月既基本洗費就係 150 * 31 + 800 = 5450一個月, 

          一年就係65400蚊, 
          即係你既被動收入需要65400蚊先可以叫做基本財自喇

2. 咁要點做先可以一年無神神多65400蚊呢?

          咁就要帶到一個非常重要既重點, 
          就係富爸爸既概念: 買入資產, 遠離負債

          係咩意思呢? 簡單d講就係買既野, 
          要可以幫你產生現金流, 每個月塞錢入你戶口, 

          好多人以為買車買樓係資產, 但係其實係負債黎, 

          因為佢你要每個月比按揭比油錢比停車場錢, 
          一直係你戶口拎錢,

          同我地既方向係行左相反既路

          咁買咩叫資產呢?

          我地九十後零零後本少, 入場費最低就只能夠係股票之類

          所以之後我會集中講買股票既心路歷程 
          ( 利申定, 我係買入不賣出 )

          咁除左股票, ibond, 樓都可以係資產, 
          只要你租出去比你供既多就有正現金流

          要一年有65400現金流, 個本到底要幾大呢?

          假設有一樣資產, 每年可以比到5%回報你,

          咁65400的話個本就要有 1308000 蚊

          換句話講, 只要你有1308000咁多錢, 
          你就可以唔洗再擔心冇飯食嚕

          得喇知你地會問咩野有5%年回報, 我就戴定頭盔先

          股票價格可升可跌, 投資有風險,

          現價匯豐控股 (00005) 既股利回報一年係有5%既, 即係只要你有咁多匯控, 你就可以有基本財自喇!

後話: 1308000呢個本到底要點先有呢, 靠儲蓄? 靠投資? 請等我下一篇同你講講更多既詳細

財務自由既概念同埋方向 (一)

財務自由就好似上一篇文所講咁
錢唔再係煩惱, 而你又有足夠既收入黎解決日常既開支
但係剩係講左呢個狀態就冇同大家講到底實際上發生左咩事
同埋點先可以達到呢種狀態既

咁首先同大家講下收入既來源
相信大家係九十後零零後既咁多位
都係岩岩投身社會工作/ 仲讀緊書都未定
咁大家靠既係咩呢?

冇錯就係工作收入, 手停口停
呢個收入來源簡單D講就係叫做主動收入
仲有好多種主動收入既, 例如做Freelance, 填問卷etc...
咁換句話講, 自然有被動收入啦

咩話?? 咩叫被動收入?
被動收入即係你唔洗做任何野
自動會有收入/錢滾入你戶口既意思
咁財務自由既意思就係被動收入能夠負擔起你一部份/ 全部既生活開支
而被動收入既例子有咩呢?
股息, 債息, 收租, 公司營利等等.....

聽落好似好正啵
當然事實上都係好正既
但係就需要大家既毅力去做
因為往往呢d野唔係一日半日就可以達成
尤其是係我地呢d small potato
至於點解, 請參考下一篇文章

講講財務自由

大家好

第一篇想同大家分享既係財務自由~

咁我相信大家都知識咩叫退休架啦
就係去到一定年紀就唔再返工
但係唔再返工既前題係有一定條件既
就係筆退休金喇

我諗大部份人對退休金既睇法都係
年輕工作時存低一舊錢
之後到65歲就慢慢搣佢, 享受生活咁
有時仲會驚自己太長命添, 唔夠錢洗咁
諗起都驚

而財務自由同退休其實係有d類似
就係有能力唔洗靠返工提供日常既開支
而且係要係仲年青力壯既時候完成
而唔係老到一個點先得

但係財自左之後唔代表唔做野啵
而係有自己既時間去做自己想做既野
過自己既生活
有d人想去做記者
有d人想環遊世界
有d人想開間鋪頭仔咁
身為岩岩出黎社會做野既90後打工仔
相信宜家都係覺得人生就咁玩完都未定

但係我想同你地講既係
只要靠住我地微薄既收入
加上無比堅定既意志
其實要實現以上既生活並唔係冇可能
可能咁樣講好似烏托邦發緊夢咁

但係夢想既野, 就係遠大, 遙不可及
當你成功既時候就會覺得一路以黎既努力
係終於有回報

下一篇會講下財務自由既概念同條路點行
請大家密切留意!!

今日係本BLOG正式開張既日子

老實講其實一早想試下寫BLOG好耐
一路都有追好多唔同人既BLOG
例如: 止凡, 鍾記, STARMAN, 市場先生, 太多不能盡錄

但係係有基本財務知識之前其實跟本寫乜都唔會寫得出
去到宜家叫做有少少知識
同埋有少少股票資產之後
就決定開呢個BLOG黎試下表達自己既意見
最主要會講存錢心態先, 月股股票都可能會有D
希望可以同大家分享, 尤其是都係九十後, 零零後既朋友, 講下存錢既心得

每日一篇

一定有好多不足之處, 請大家好好見諒!

一名想存錢既九十後上